Mandement des généraux des Monnaies à Benoît Seigneuret, général des Monnaies subsidiaire en Dauphiné, exécutoire des lettres patentes du 11 janvier 1546, autorisant la fabrication en la Monnaie de Grenoble de la quantité de 500 marcs d'oeuvre de liards et en la Monnaie de Romans de la même quantité de 500 marcs d'oeuvre de liards

1546, 26 octobre

Arch. nat., Z1b 63 f° 226v°. Copie

Les généraulx conseillers du roy, notre seigneur, sur le faict de ses monnoyes. A maître Benoist Seigneuret, conseiller dud. seigneur et général desd. Monnoyes subsidiaire au païs de Daulphiné, salut. Veue la requeste à nous présentée par les procureur et scindicq du païs dud. Daulphiné tendant à ce que suivant les lettres patentes par eulx obtenues dud. seigneur dès le unzième jour de janvier dernier passé, eussions à permectre et souffrir aux maîtres particuliers des Monnoye de Grenoble et Romans, assises aud. païs quelque quantité de deniers liardz, doubles et petitz deniers tournois pour subvenir au soulagement des habitans dud. païs et convertir en telle menue monnoye plusieurs menues monnoyes estrangères aians cours et volunté de peuple et non comprinses en l'ordonnance dud. seigneur et desquelles lesd. maistres particuliers ne peuvent donner la vraye et juste valleur pour la diversité des poix et loy d'icelles, et sans l'ouvrage et fabrication desquelz liardz, doubles et petitz deniers tournois lesd. monnoyes estrangères ne se peuvent fondre et difformer pour estre converties en monnoye aux coing et armes dud. seigneur. Veue lad. requête, ensemble lesd. lettres patentes desquelles la coppie est cy-atachée soubz l'un de noz seaulx, données à Sainct-Germain-en-Laye le XIe jour de janvier MVc quarente-cinq dernier passé, signées Par le roy, daulphin, à la relation du Conseil, Lepicard, et seellées de cire rouge en simple queue, veuz aussi les procès-verbaux de maîtres Claude Monperlier et Philippes de Laultier, conseillers dud. seigneur et généraulx de ses Monnoyes, naguères par nous commis pour faire la visitation desd. monnoyes aud. païs de Daulphiné, nous, en entérinant lesd. lettres patentes, vous mandons et commectons par ces présentes que vous aiez à faire ouvrer et monnoyer esd. Monnoies de Grenoble et Romans, par les maîtres particuliers d'icelles, la quantité de mil marcs desd. deniers liardz, qui est pour chacune desd. Monnoyes cinq cens marcs, s'il vous appert que pour le soulagement dud. païs et habitans d'icellui soit besoing en faire ouvrer et monnoyer telle quantité, et lesquelz mil marcs desd. deniers liardz vous mandons et commectons faire ouvrer et monnoyer dedans deux mois prochains et ensuivans la première délivrance qui en sera faicte par chacun desd. maîtres particuliers desd. Monnoyes de Grenoble et Romans. Lesquelz deniers liardz faictes ouvrer et monnoyer de XIX sols III deniers de taille, qui vallent IIcXXXI pièce d'iceulx au marc de Paris et du poix de XIX grains tresbuchans chacune pièce, au remedde d'un grain sur le fort et sur le foible, et deux deniers desd. deniers liardz de remedde sur marc, tellement que à la délivrance qui en sera faicte ilz soient de IIcXXXIII pièces pour le plus foible et à deux deniers six grains de loy argent-le-roy, qui sont deux deniers quatre grains trois quartz fin, à deux grains dud. argent-le-roy de remedde, vous donnant bien garde qu'il n'en soit point faict plus grande quantité que celle cy-dessus contenue et qu'elle soit faicte et parachevée dedans le temps dessusd. et délivré des poix, loy et aux remeddes cy-dessus et sans ce que pour la fabrication et ouvraige de lad. quantité desd. deniers liardz lesd. maîtres particuliers soient aucunement deschargez de partie ou porcion de l'ouvraige ou faictfort qu'ilz sont tenuz faire par chacun an par la vérification des lettres du bail de maistrise à eulx faict par led. seigneur. De ce faire vous donnons pour (sic pour pouvoir) par ces présentes et mandons aux gardes, tailleur, essayeur et autres officiers desd. Monnoyes et tous autres qu'il appartiendra que à vous, en ce faisant, soit obéy. Donné à Paris en la Chambre desd. monnoies, soubz noz seaulx, le vingt-sixième jour d'octobre l'an mil cinq cens quarente-six.