Autorisation accordée par les généraux des Monnaies à Cosme du Moustier, maître particulier de la Monnaie de Rouen, pour faire fabriquer en la Monnaie de Rouen la quantité de 500 marcs d'oeuvre de petits deniers tournois

1546, 17 mars

Arch. nat., Z1b 12 f° 54v°. Mention

Sur la requeste présentée par Cosme du Moustier, maistre particullier de la Monnoye de Rouen, contenant qu'il est besoing suyvant les bonnes coustumes pour subvenir aux povres et menu peuple faire forger, ouvrer et monnoyer en ladicte Monnoye de Rouen quelque quantité de petitz deniers tournois noirs à ce temps de Caresme, requérant à ceste cause led. suppliant luy estre permis de faire ouvrer et monnoyer en ladicte Monnoye de Rouen la quantité de cinq cens marcs desd. petitz deniers tournois ou telle aultre quantité qu'il nous plaira. Considéré le contenu de laquelle requeste, il est permis aud. Cosme du Moustier, suppliant, faire ouvrer et monnoyer en ladicte Monnoye de Rouen la quantité de cinq cens marcs desd. petitz deniers tournois noirs, à XVIII grains de loy argent-le-roy, qui sont dix-sept grains ung quart fin, à deux grains dud. argent-le-roy de remedde, et de vingt-ung solz de taille au marc, qui sont deux cens cinquante-deux pièces aud. marc, et de dix-huit grains de poix chacune pièce, au remedde d'un grain sur le fort et sur le foible, tellement que à la délivrance ilz ne soient plus foibles de trois pièces pour marc, lequel ouvraige de petitz deniers tournois il sera tenu faire dedans le dernier jour d'avril prochainement venant.