Mandement des généraux des Monnaies aux gardes de la Monnaie de Nantes, exécutoire des lettres patentes du 9 juillet 1544, autorisant Jean Taupier, maître particulier de la Monnaie de Nantes, de fabriquer jusqu'à la quantité de 3.000 marcs d'oeuvre de testons et demi-testons

1544, 11 juillet

Arch. nat., Z1b 63 f° 182v°. Copie

Les généraulx conseillers du roy, notre <...> sire, sur le faict de ses monnoyes. Aux gardes de la Monnoye de Nantes. Veues par nous les lettres patentes du roy, notred. seigneur, données en ceste ville de Paris le neufvième jour de ce présent mois de juillet, obtenues et à nous présentées de la partie de Jehan Taupier, maître particulier de lad. Monnoye de Nantes, dont la coppie deuement collationnée à l'original, signée du greffier de la Chambre desd. monnoyes, est cy-atachée soubz l'un de noz signetz, par lesquelles, pour les causes y contenues led. seigneur a par l'advis et délibération de son Conseil privé et de certaine science, plaine puissance et auctorité royal permis et octroyé aud. Jehan Taupier qu'il puisse et luy soit loisible achepter des subjectz desd. marchans, marigniers ou autres tout l'argent qui sera porté en lad. Monnoye de Nantes pour monnoyer gros et demys gros testons pour le pris et à la charge de faire valloir chacun marc d'argent solt de loy quatorze livres dix solz tournois et en faire ouvrer, forger et monnoyer desd. testons et demy testons du poix et aloy selon et ainsi qu'il est contenu aux ordonnances dud. seigneur au pris et valleur chacun teston de unze solz tournois et de demy à l'équipollent jusques à la quantité de trois mil marcz d'argent dedans ung an prochainement venant à commencer de la dacte et expédition desd. lettres patentes et vériffication d'icelles, en payant aud. seigneur toutesfois par led. Jehan Taupier le droict de seigneuriaige avecq les foiblaiges et escharcetez de loy qui se trouveront par le jugement dud. ouvraige, et là où icellui Taupier n'aura entièrement ouvré et monnoyé lad. quantité de trois mil marcz d'iceulx gros et demys-gros testons dedans led. temps d'un an paier néantmoins aud. seigneur le droit de seigneuriaige de ce qui restera à ouvrer comme plus à plain le contiennent lesd. lettres patentes. Oy sur lesquelles le procureur du roy, notred. seigneur, sur le faict desd. monnoyes et veu son consentement, nous vous mandons et commetons de par le roy, notred. sieur, et par nous, par ces présentes que des lingotz et matières d'argent qui proviendront des prinses qui seront faictes par mer ès pays de Bretaigne ou des cendrées qui seront apportées en lad. Monnoye de Nantes par les subjectz, <...>, manans et habitans dud.pys de Bretaigne, après avoir prins par vous dud. Taupier bonnes et suffisantes cautions de faire lesd. troys mil marcz de gros et demyz-gros testons dedans ung an prochainement venant à compter du jour et dacte de ces présentes ou de paier au roy, notred. seigneur le droict de son seigneuriaige de ce qui restera à ouvrer desd. trois mil marcz d'iceulx gros et demys gros testons, le brassaige rabatu, desquelles cautions nous envoyerez les lettres originalles dedans sept sepmaines prochainement venant pour icelles enregistrer au greffe de la Chambre desd. monnoyes en la manière acoustumée, vous faictes ouvrer, batre et monnoyer en lad. Monnoye de Nantes trois mil marcz seullement de gros et demyz-gros testons au coing et armes dud. sieur, à unze deniers six grains de loy argent-le-roy, à ung grain de remède dud. argent-le-roy, et de deux solz ung denier et demy de taille au marc de Paris, sui sont vingt-cinq pièces et demy de taille aud. marc, au remède d'un grain sur chacune pièce sur le fort et sur le foible, en sorte que les plus foibles soient de sept deniers dix grains tresbuchans et les demies de trois deniers dix-sept grains, au brassaige de cinq solz six deniers tournois pour marc dud. ouvraige, qui est le semblaige (sic) accordé au maistre des Monnoyes de Lyon, Rouen, Tours et Rennes, en metant en boeste de trente-huict solz trois deniers desd. deniers gros testons ung denier d'iceulx, et faisant bailler pr led. Taupier aux ouvriers de lad. Monnoye de Nantes quinze deniers pour marc d'oeuvre sans aucun déchet et aux monnoyers sept deniers tournois, et lesquelz gros et demyz-gros testons délivrez en neuf marcz à trois poix, chacun poix de trois marcz, au remède sur lesd. neuf marcz d'une pièce et non plus, sans à ce que la quantité dud. ouvraige vienne à diminution, en faisant mectre par le tailleur de lad. Monnoye de Nantes, oultre le point ancien et lettre de la ville dud. lieu et différence dud. maistre ung point dedans le G de GRACIA, en faisant au surplus par vous garder telles dilligences que lad. Monnoye de Nantes soit garnie d'ouvriers et monnoyers pour la fabrication dud. ouvraige en sorte qu'il n'y ait défault, sur peyne de respondre par vous de l'intérest qui par faulte de ce en pourroit venir aud. seigneur et aud. Taupier. Donné à Paris en la Chambre desd. monnoyes, soubz noz sceaulx, le unzième jour de juillet l'an mil cinq cens quarante-quatre.