|



Mandement des généraux des Monnaies aux gardes de la Monnaie de Limoges, exécutoire des lettres patentes du 27 février 1544, autorisant François Dauvergne, maître particulier de la Monnaie de Limoges, de fabriquer jusqu'à la quantité de 500 marcs d'oeuvre de testons et demi-testons

1544, 13 mai

Arch. nat., Z1b 63 f° 140v°. Copie

Les généraulx conseillers du roy, notre sire, sur le faict de ses monnoyes. Aux gardes de la Monnoye de Lymoges. Veues par nous les lettres patentes du roy, notred. seigneur, données à Paris le XXVIIe jour de février mil Vc quarente-troys et dernier passé, obtenues et à nous présentées de la partye de Françoys Dauvergne, maistre de la Monnoye de Lymoges, dont la coppie deuement collationnée à l'original, signée du greffier de la Chambre desd. monnoyes, est cy-atachée soubz l'un de noz signetz, par lesquelles et pour les causes y contenues led. seigneur a, par l'advis et délibération de son Conseil privé et de sa certaine science, plaine puissance et auctorité royal, permis et octroyé aud. Françoys Dauvergne qu'il puisse et luy loyse achapter ou faire achapter des marchans, changeurs, orfèvres et autres personnes les testons légiers et lingotz d'argent qui seront portez en lad. Monnoye de Lymoges pour convertir en gros et demys-gros testons pour le prys et à la charge de faire valloir chacun marc d'argent quatorze livres dix solz tournois et en faire ouvrer et monnoyer lesd. testons et demys-testons des poix et alloy sellon et ainsy qu'il est contenu ès ordonnances dud. seigneur au prys et valleur chacun teston de unze sols tournois et le demy à l'équipollent, jusques à la quantité de cinq cens marcz desd. testons et à tel et semblable brassaige que led. seigneur a ordonné au maître de la Monnoye de Lyon, en payant toutesfoys par led. Dauvergne aud. seigneur le droict de seigneuriaige avec les foiblaiges et escharcetez de loy qui se trouveront par le jugement dud. ouvraige entièrement ouvré et monnoyé comme plus à plain le contiennent lesd. lettres patentes. Oy sur lesquelles le procureur du roy en lad. Chambre, nous vous mandons de par led. seigneur et nous par ces présentes que des testons légers, lingotz et autres matières d'argent qui seront portez en lad. Monnoye de Lymoges par les marchans, changeurs, orfèvres et autres personnes, après avoir prys par vous dud. Dauvergne bonnes et suffisantes cautions de faire lesd. cinq cens marcz de gros et demys-testons dedans le jour saint-Rémy prochainement venant ou payer au roy, notre seigneur, le droict de seigneuriage de ce qu'il restera à ouvrer desd. cinq cens marcz d'iceulx gros et demys-gros testons, le brassaige rabbatu, desquelles cautions nous envoyez les lettres originalles dedans six sepmaines prochaines venantes pour icelles enregistrer au greffe de la Chambre desd. monnoyes, vous faictes ouvrer, baptre et monnoyer en lad. Monnoye de Lymoges cinq cens marcz seullement de gros et demys-gros testons dedans led. jour Sainct-Rémy prochainement venant, aux coing et armes dud. seigneur, à unze deniers six grains de loy argent-le-roy, à ung grain de remedde dud. argent-le-roy et de deux solz ung denier et demy de taille au marc de Paris, qui sont vingt-cinq pièces et demye de taille aud. marc, au remedde d'un grain sur chacune pièce sur le fort et sur le foible, en sorte que les plus foibles soient de sept deniers dix grains tresbuchans et les demys de troys deniers dix-sept grains tresbuchans, tellement que à la délivrance ilz ne soient plus foibles en neuf marcz que d'une pièce desd. gros testons, au brassaige de V sols VI deniers pour marc dud. ouvraige qui est le semblable accordé aux maîtres des Monnoyes de Lyon, Rouen et Tours, en mectant en boeste de trente-huict solz troys deniers desd. deniers gros et demys-gros testons, qui sont dix-huict marcz ung denier d'iceulx, et faisant bailler par led. Dauvergne aux ouvriers de lad. Monnoye de Lymoges quinze deniers tournois pour marc d'oeuvre sans aucun deschet et aux monnoyers sept deniers, et lesquelz gros et demys-gros testons vous ferez délivrer en neuf marcz à troys poix, chacun poix de troys marcz, au remedde sur lesd. neuf marcz d'une pièce et non plus, sans ce que la quantité dud. ouvraige vienne à diminution du faictfort dont a esté et est par nous chargé led. Dauvergne par la vériffication du bail de sa maistrise, en faisant mectre par le tailleur de lad. Monnoye de Lymoges, oultre le poinct ancien et lettre de la ville dud. lieu de Lymoges et différence dud. Dauvergne, maître d'icelle Monnoye, ung poinct dedans le dernier C de FRANCISCUS, en faisant au surplus par vous telle dilligence que lad. Monnoye soit garnie d'ouvriers et monnoyers pour la fabrication dud. ouvraige, en sorte qu'il n'y ayt défault sur peine de respondre par vous de l'intérest qui par faulte de ce en pourroit venir au roy, notred. seigneur, et aud. Dauvergne. Donné à Paris en la Chambre desd. monnoyes, soubz noz sceaulx, le XIIIe jour de may l'an mil VcXLIIII.