|



Mandement des généraux des Monnaies aux gardes de la Monnaie de Lyon, exécutoire des lettres patentes du 25 juillet 1543, autorisant François Guilhem, maître particulier de la Monnaie de Lyon, de fabriquer jusqu'à la quantité de 24.000 marcs d'oeuvre de testons et demi-testons

1543, 7 août

Arch. nat., Z1b 63 f° 61r°. Copie

Les généraulx conseillers du roy, notre seigneur, sur le faict de ses monnoyes. A Claude de Longueville et Jehan Avillon, gardes de la Monnoye de Lyon, salut. Veues par nous les lettres patentes du roy, notre seigneur, données en ceste ville de Paris le XXVe jour de juillet mil Vc quarente-troys et dernier passé, obtenues et à nous présentées de la partye de Françoys Guilhem, maître particullier de la Monnoye de Lyon, dont la coppie deuement collationnée par le greffier de la Chambre desd. monnoyes est cy-atachée soubz l'un de noz signetz. Nous vous mandons et commectons de par led. seigneur et nous par ces présentes que vous faictes continuer l'ouvraige des gros et demys-gros testons aux coing et armes dud. seigneur, à unze deniers six grains de loy argent-le-roy, à ung grain de remedde dud. argent-le-roy et de deux solz ung denier et demy de taille au marc de Paris, qui sont vingt-cinq pièces et demye de taille aud. marc, au remedde d'un grain sur chacune pièce sur le fort et sur le foible, en sorte que les plus foibles soient de sept deniers deux grains tresbuchans et les demys à troys deniers dix-sept grains, en mectant en boeste de trente-huict solz troys deniers desd. deniers gros testons ung denier d'iceulx et faisant bailler par led. Guilhem aux ouvriers de lad. Monnoye quinze deniers tournois pour marc d'oeuvre sans aucun déchet et aux monnoyers seot deniers tournois, et lesquelz gros et demys-gros testons délivrez en neuf marcs à troys poix, chacun poix de troys mars, au remedde sur lesd. neuf mars d'une pièce et non plus, en faisant mectre par le tailleur de lad. Monnoye de Lyon oultre la différance de lad. ville et dud. maître particullier qui est une treufle et ung F romain à la fin de la légende et ung poinct sous la douzième lettre et ung D romain sous l'escu et ung poinct dedans le premier C de FRANCISCVS, en faisant par vous telle dilligence que lad. Monnoye soit garnye d'ouvriers et monnoyers pour la fabrication dud. ouvraige en sorte qu'il n'y ait deffault, sur peyne de respondre par vous de l'intérest qui par faulte de ce en pourroit venir aud. seigneur. Donné à Paris en la Chambre desd. monnoyes, soubz noz sceaulx, le septième jour d'aoust l'an mil Vc quarente-troys.