|



Mandement des généraux des Monnaies aux gardes de la Monnaie de Paris, exécutoire des lettres patentes du 20 septembre 1542, autorisant la fabrication de testons et demi-testons par l'atelier monétaire de Paris

1542, 2 octobre

Arch. nat., Z1b 63 f° 52v°. Copie

De par les généraulx conseillers du roy, notre sire, sur le faict de ses monnoyes. Gardes de la Monnoye de Paris. Nous avons receu lettres patentes du roy, données à Sallelles le XXe jour de septembre dernier passé, par lesquelles icellui seigneur veult et nous mande que incontinent et en la plus grande dilligence que possible sera nous facion fondre et convertir en ouvraige de gros et demyz-gros testons en la Monnoye de ceste ville de Paris et non ailleurs et pour ceste foys seullement toute la vesselle d'argent provenant des empruntz naguères faictz par led. seigneur et non autre qui y sera portée ou envoyée par maître Jehan la Guette, recepveur général des Finances extraordinaires et parties casuelles ou ses commis. A ceste cause vous mandons que incontinant et le plus dilligement que possible vous sera vous ayez à faire convertir en deniers gros testons toute la vesselle d'argent, laquelle vous sera baillée et délivrée par led. trésorier la Guette ou sesd. commis, et faictes faire lesd. deniers gros et demys-gros testons à unze deniers six grains de loy argent-le-roy, à ung grain de remedde dud. argent-le-roy, et de deux solz I denier et demy de taille aud. marc, qui sont vingt-cinq pièces et demye de taille aud. marc, qui sont sept deniers dix grains trébuchans chacune pièce, et lesd. demys-gros à l'équipollent, en sorte que ne soit poinct plus foible que de sept deniers dix grains trébuchans, et mectez en boueste de trente-huit sols III deniers I denier, qui font dix-huit marcs, et aura le maistre de lad. Monnoye pour son brassaige V sols tournois, si ne faillez d'acomplir incontinant le contenu cy-dessus. Escript à Paris en la Chambre desd. monnoyes le deuxième jour d'octobre l'an mil cinq cens quarente-deux.