|



Autorisation accordée par les généraux des Monnaies à François Dauvergne, maître particulier de la Monnaie de Limoges, pour faire fabriquer en la Monnaie de Limoges la quantité de 400 marcs d'oeuvre de liards, 300 marcs d'oeuvre de doubles deniers tournois et 300 marcs d'oeuvre de petits deniers tournois

1542, 12 août

Arch. nat., Z1b 10 f° 161r°. Mention

Sur la requeste présentée à la Chambre de céans par Françoys Dauvergne, maistre particullier de la Monnoye de Lymoges, contenant que en lad. ville de Lymoges et pays de Lymosin qui est <...> et chargé de grosses tailles et emprunctz où il y a charté de bledz, ains tellement que le commung peuple dud. pays ne peult recouvrer de menue monnoye blanche et noire pour subvenir à leurs négoces et affaires ainsi qu'il nous est apparu par attestation donnée aud. Lymoges le neufiesme jour de juing mil VcXLI, requérant à ceste cause led. suppliant luy estre par nous permis faire ouvrer et monnoyer en lad. Monnoye telle quantité de liars, doubles et petis deniers tournois qu'il nous plairoit ordonner pour subvenir au menu peuple dud. pays. Considéré le contenu de laquelle requeste il est permis aud. suppliant faire ouvrer et monnoyer en lad. Monnoye de Lymoges la quantité de mil marcs de menue monnoye, assavoir quatre cens marcs de liars, troys cens marcs de deniers doubles et troys cens marcs de deniers petis tournois, des poix, loy et aux remeddes cy-après déclairez, assavoir lesd. deniers liars à deux deniers six grains de loy argent-le-roy, qui est de loy deux deniers troys grains troys quars de grain fin, à deux grains de loy dud. argent-le-roy de remedde, et de dix-neuf solz troys deniers de taille au marc de Paris, qui sont deux cens trente-une pièce aud. marc et dix-neuf grains tresbuchans chacune pièce, au remedde d'un grain sur le fort et sur le foible chacune pièce, tellement que à la délivrance ilz ne soient plus foibles de deux pièces sur chacun marc, lesd. deniers doubles à ung denier six grains de loy argent-le-roy, qui est de loy ung denier quatre grains troys quars fin, à deux grains de remedde dud. argent-le-roy, et de seize solz quatre deniers de taille aud. marc, qui sont neuf-vingtz-seize pièces pour marc et XXIII grains et demy chacune pièce, au remedde d'un grain sur le fort et sur le foible chacune desd. pièces, en sorte qu'ilz ne soient plus foibles de troys pièces pour marc à la délivrance, et lesd. petis deniers tournois à dix-huict grains de loy argent-le-roy, qui sont dix-sept grains ung quart fin de loy, à deux grains dud. argent-le-roy de remedde, et de XXI sols de taille aud. marc, qui sont deux cens cinquante-deux pièces aud. marc, et dix-huict grains de poix chacune pièce, au remedde d'un grain sur le fort et sur le foible, à ce que à la délivrance ilz ne soient plus foibles de troys pièces pour marc. Et est enjoinct aux gardes de lad. Monnoye de Lymoges de ne souffrir et laisser ouvrer et monnoyer en icelle plus grande quantité desd. liars, doubles et petis deniers tournois que dessus est dict, sur peine de l'amende contenue ès ordonnances du roy.