|



Mandement des généraux des Monnaies aux gardes, tailleur, essayeur, contregarde et maître particulier de la Monnaie de Dijon portant injonction de continuer en la Monnaie de Dijon la fabrication des écus d'or au soleil, de fabriquer des douzains et autorisant la fabrication de la quantité de 500 marcs d'oeuvre de liards, 300 marcs d'oeuvre de doubles deniers tournois et 200 marcs d'oeuvre de petits deniers tournois

1541, 16 décembre

Arch. nat., Z1b 63 f° 19r°. Copie

De par les généraulx conseillers du roy, notre seigneur, sur le faict de ses monnoyes. Gardes, tailleur, essayeur, contregarde et maître particulier de la Monnoye de Dijon. Nous vous mandons que ayez à faire continuer l'ouvrage des deniers d'or escuz au soleil à XXIII karats, à I/VIIIe de karat de remedde, de soixante-unze escuz et ung sixième d'escu de poix au marc de Paris et de deux deniers seize grains troys quartz chacune pièce, au remedde d'ung quart de grain sur le fort et sur le foyble chacune pièce, en sorte qu'ilz ne soient à la délivrance plus foybles en troys marcs de quatre félins et demy, et desd. deniers escuz ne ferez aucune délivrance qu'il n'y ayt troys marcs pour le moings, en mectant en boeste de deux cens desd. deniers escuz monnoyez et délivrez ung denier escu pour après en faire les jugemens. Aussi ferez ouvrer et monnoyer deniers grans blancs douzains à trois deniers seize grains de loy argent-le-roy, qui est de loy trois deniers douze grains ung tiers de grain fin, à deux grains dud. argent-le-roy de remedde, les faisant tailler du poix et recours de deux deniers troys grains chacune pièce, à ce que après le blanchissaige fait ilz reviennent du poix de deux deniers deux grains chacune pièce, en sorte qu'ilz soient de sept solz sept deniers I quart de denier aud. marc, qui sont IIIIxx unze pièces I quart de pièce, à I grain de remedde chacune pièce sur le fort et sur le foyble, tellement qu'il y en ayt autant de fors que de foybles, et que à la délivrance ilz ne soient plus foybles que de demye-pièce pour marc, qui est en neuf marcs quatre pièces et demye, et lesquelz deniers douzains délivrerez en neuf marcs en trois poix, chacun poix de troys marcs, et faictes mectre en boeste de LX sols desd. deniers douzains monnoyez et délivrez, qui sont XXXVI livres d'iceulx ung denier desd. douzains, en faisant donner par le maistre particulier aux marchands et changeurs du marc d'or fin VIIIxxV livres VII sols VI deniers tournois, et du marc d'argent à XII deniers de loy argent-le-roy, qui est unze deniers douze grains fin, XIIII livres tournois. Aussuplus permectons à vous, maître particulier, que puissiez faire ouvrer et monnoyer en lad. Monnoye de Dijon la quantité de cinq cens marcs de lyards, troys cens marcs de deniers doubles et deux cens marcs de petitz deniers tournois, des poix, loy et aux remeddes qui s'ensuyvent, c'est assavoir lesd. deniers lyards à deux deniers VI grains de loy argent-le-roy, qui est de loy deux deniers troys grains trois quartz de grain fin, à deux grains de loy dud. argent-le-roy de remedde, et de XIX sols III deniers de taille aud. marc de Paris, qui sont IIcXXXI pièces aud. marc et dix-neuf grains trébuschans chacune pièce, au remedde d'ung grain sur le fort et sur le foyble chacune pièce, tellement que à la délivrance ilz ne soient plus foybles de deux pièces sur chacun marc, qui est en neuf marcs dix-huict pièces, et lesd. deniers doubles tournois à ung denier six grains de loy argent-le-roy, qui est de loy ung denier quatre grains trois quartz fin, à deux grains de remedde dud. argent-le-roy, et de XVI solz quatre deniers de taille aud. marc, qui sont IXxxXVI pièces pour marc et XXIII grains et demy chacune pièce, au remedde d'ung grain sur le fort et sur le foyble chacune desd. pièces, tellement qu'ilz ne soient plus foybles de troys pièces pour marc à la délivrance, qui est en IX marcs vingt-sept pièces, et lesd. petitz deniers tournois à XVIII grains de loy argent-le-roy, qui sont XVII grains I quart fin de loy, à deux grains dud. argent-le-roy de remedde, et de XXI solz de taille aud. marc, qui sont IIcLII pièces aud. marc et XVIII grains de poix chacune pièce, au remedde d'ung grain sur le fort et sur le foyble, tellement que à la délivrance ilz ne soient plus foibles de trois pièces pour marc, qui est en neuf marcs vingt-sept pièces, et lesquelz deniers lyards, doubles et petitz deniers tournois délivrerez pareillement en neuf marcs à troys poix, chacun desd. poix de troys marcs, en mectant en boeste de LX sols desd. deniers lyards monnoyez et délivrez, vallant IX livres d'iceulx, I denier lyard, et de LX sols desd. deniers doubles tournois, vallant VI livres d'iceulx, ung denier double tournois en boeste, et de LX sols desd. petitz deniers tournois, vallant LX sols d'iceulx, ung petit denier tournois, et vous donnez garde qu'il ne soit ouvré et monnoyé plus grande quantité desd. deniers lyards, doubles et petitz deniers tournois que dessus...
[...]
Escript à Paris en la Chambre desd. monnoyes le XVIe jour de décembre l'an mil Vc quarente et ung.
Lesd. lettres baillées le XIXe jour dud. moys à Anthoyne Droynot, l'un des gardes de lad. Monnoye de Dijon.

Voir Arch. nat., Z1b 10 f° 83 r° (16 décembre 1541) : Autorisation accordée par les généraux des Monnaies à Jacques Bergeron, commis à la maîtrise particulière de la Monnaie de Dijon, pour faire fabriquer en la Monnaie de Dijon la quantité de 500 marcs d'oeuvre de liards, 300 marcs d'oeuvre de doubles deniers tournois et 200 marcs d'oeuvre de petits deniers tournois.