|
Mandement des généraux des Monnaies aux gardes, tailleur, essayeur, contregarde et maître particulier de la Monnaie de Bordeaux autorisant la fabrication en la Monnaie de Bordeaux de la quantité de 500 marcs d'oeuvre de liards, 300 marcs d'oeuvre de doubles deniers tournois et 200 marcs d'oeuvre de petits deniers tournois
1541, 5 novembre
Arch. nat., Z1b 63 f° 11r°. Copie
De
par les généraulx conseillers du roy sur le faict de ses
monnoyes. Gardes, tailleur, essayeur, contregarde et maistre particulier
de la Monnoye de Bordeaulx. Nous avons receu une requeste, laquelle nous
a esté présentée de la partye de vous, maître
particulier de lad. Monnoye, contenant que dez longtemps a il ayt esté
livré en votred. Monnoye par aucuns marchans, changeurs et autres
personnes grande quantité de bas billon dont requérez par
votred. requeste vous estre par nous permys de faire ouvrer et monnoyer
lyards, doubles et petitz deniers tournois, sur laquelle requeste et pour
considération du contenu en icelle nous avons permys et permectons
par ces présentes à vous, gardes et autres officiers susd.,
de faire batre, ouvrer et monnoyer en lad. Monnoye cinq cens marcs de
lyards, troys cens marcs de deniers doubles et deux cens marcs de petitz
deniers tournois, c'est assavoir lesd. deniers lyards à deux deniers
six grains de loy argent-le-roy, qui est de loy deux deniers trois grains
troys quartz de grain fin, à deux grains de loy dud. argent-le-roy
de remedde, et de dix-neuf solz troys deniers de taille au marc de Paris,
qui sont deux cens trente et une pièce oud. marc et dix-neuf grains
tresbuchans chacune pièce, au remedde d'ung grain sur le fort et
sur le foyble chacune pièce, tellement que à la délivrance
ilz ne soient plus foybles de deux pièces sur chacun marc, et lesd.
deniers doubles tournois à ung denier six grains de loy argent-le-roy,
qui est de loy ung denier quatre grains troys quartz fin, à deux
grains de remedde dud. argent-le-roy, et de seize solz quatre deniers
de taille aud. marc de Paris, qui sont neuf-vingtz-seize pièces
pour marc et XXIII grains et demy chacune pièce, au remedde d'ung
grain sur le fort et sur le foyble chacune desd. pièces, tellement
qu'ilz ne soient plus foybles de troys pièces pour marc à
la délivrance, et lesd. petitz deniers tournois à XVIII
grains de loy argent-le-roy, qui sont XVII grains ung quart fin de loy,
à deux grains dud. argent-le-roy de remedde, et de XXI solz de
taille aud. marc, qui sont deux cens cinquante-deux pièces aud.
marc et dix-huict grains de poix chacune pièce, au remedde d'ung
grain sur le fort et sur le foyble, tellement que à la délivrance
ilz ne soient plus foybles de troys pièces pour marc, et lesquelz
deniers lyards, doubles et petitz deniers tournois délivrerez pareillement
en neuf marcs à troys poix, chacun desd. poix de troys marcs, en mectant
en boeste de LX sols desd. deniers lyards monnoyez et délivrez, vallant
neuf livres d'iceulx, ung denier lyard, et de LX sols desd. deniers doubles
tournois, vallant VI livres d'iceulx, ung denier double tournois en boeste,
et de LX sols desd. petitz deniers tournois, vallant LX sols d'iceulx,
ung petit denier tournois, et ne faictes ouvrer et monnoyer plus grande
quantité desd. lyards, doubles et petitz tournois que la quantité
cy-dessus désignée...
[...]
Escript à Paris en la Chambre desd. monnoyes le Ve jour de novembre
l'an mil Vc quarente et ung.
Semblables lettres ont esté ced. jour escriptes aux gardes, tailleur, essayeur, contregarde et maistre particulier de la Monnoye de Bayonne.