Ordonnance de la Chambre des monnaies relative à la fabrication des écus d'or au soleil, douzains, liards, doubles et petits deniers tournois

1541, 6 septembre

Arch. nat., Z1b 63 f° 8v°. Copie

Suyvant les lettres patentes du roy données au Bouchet le XIIe jour de juillet dernier passé et povoir donné par icelles à la Chambre de céans, lesquelles lettres sont cy-devant enregistrées, a esté ordonné en la Chambre que doresnavant seront faictz et forgez ès Monnoyes de ce royaulme, pays et seigneuries de l'obéissance du roy escuz soleil à XXIII karats, à I/VIIIe de karat de remedde, de LXXI escuz et I/VIe d'escu de poix au marc de Paris, et de II deniers XVI grains III quartz chacune pièce, au remedde d'ung quart de grain sur le fort et sur le foible chacune pièce, en sorte qu'ilz ne soient à la délivrance plus foibles en troys marcs de IIII félins et demy, et desd. escuz ne sera faicte aucune délivrance qu'il n'y ait troys marcs pour le moings, en mectant en boeste par lesd. maistres particuliers et autres officiers desd. Monnoyes de IIc desd. escuz monnoyez et délivrez ung denier, pour après en faire les jugemens. Quant aux deniers grans blancz douzains ilz seront ouvrez et monnoyez à III deniers XVI grains de loy argent-le-roy, qui est de loy III deniers XII grains I tiers de grain fin, à II grains dud. argent-le-roy de remedde, les faisant tailler de poix et recours de II deniers III grains chacune pièce, à ce que après le blanchissaige fait ilz revyennent de poix de II deniers II grains chacune pièce, en sorte qu'ilz soient de VII sols VII deniers I quart de denier aud. marc, qui sont IIIIxxXI pièces et ung quart de pièce, à I grain de remedde chacune pièce sur le fort et sur le foible, tellement qu'il y en ayt autant de fors que de foibles, à ce que à la délivrance ilz ne soient plus foibles que de demye-pièce pour marc, et lesquelz deniers douzains seront délivrez en neuf marcs à trois poix, chacun poix de III marcs, en faisant mectre en boeste de LX solz desd. deniers douzains monnoyez et délivrez, qui sont XXXVI livres d'iceulx, ung denier douzain, en faisant bailler par les maîtres particuliers des Monnoyes aux marchans et changeurs du marc d'or fin VIIIxxV livres VII sols VI deniers et du marc d'argent à XII deniers de loy argent-le-roy, qui est XI deniers XII grains fin, XIIII livres tournois. Et quant aux deniers liards, à II deniers VI grains de loy argent-le-roy, qui est de loy II deniers III grains III quartz de grain fin, à II grains de loy dud. argent-le-roy de remedde, et de XIX sols III deniers de taille aud. marc de Paris, qui sont IIcXXXI pièce aud. marc et dix-neuf grains tresbuchans chacune pièce, au remedde d'un grain sur le fort et sur le foible chacune pièce, tellement que à la délivrance ilz ne soient plus foibles de deux pièces sur chacun marc. Et lesd. deniers doubles tournois à I denier VI grains de loy argent-le-roy, qui est de loy I denier IIII grains III quartz fin, à II grains de remedde dud. argent-le-roy, et de XVI sols IIII deniers de taille aud. marc, qui sont IXxxXVI pièces pour marc et XXIII grains et demy chacune pièce, au remedde d'un grain sur le fort et sur le foible chacune desd. pièces, tellement qu'ilz ne soient plus foibles de III pièces pour marc à la délivrance. Et lesd. petitz deniers tournois à XVIII grains de loy argent-le-roy, qui sont XVII grains I quart fin, à II grains dud. argent-le-roy de remedde, et de XXI sols de taille aud. marc, qui sont IIcLII pièces aud. marc et XVIII grains de poix chacune pièce, au remedde d'ung grain sur le fort et sur le foible, tellement que à la délivrance ilz ne soient plus foybles de trois pièces pour marc. Et lesquelz deniers liards, doubles et petitz deniers tournois seront pareillement délivrez en neuf marcs à III poix, chacun desd. poix de III marcs, en mectant en boeste de LX sols desd. deniers lyards monnoyez et délivrez, vallans IX livres d'iceulx, I denier lyard, et de LX sols desd. deniers doubles tournois, vallans VI livres d'iceulx, I denier double tournois en boeste, et de LX sols desd. petitz deniers tournois, vallans LX sols d'iceulx, ung petit denier tournois.
[en marge : ] Nota. Au registre civil du XXVIe février mVcXLII y a ordonnance de la Chambre faicte sur l'ouvraige des petitz deniers tournois, baillée aux gardes de la Monnoye de Paris lesd. jour et an.

Voir au 12 juillet 1541 : Lettres patentes relatives au cours des doubles et petits deniers tournois et aux remèdes accordés aux douzains, demi-douzains, liards, doubles et petits deniers tournois (Arch. nat., Z1b 63 f° 1r°).