Mandement des généraux des Monnaies aux gardes de la Monnaie de Rouen portant injonction de continuer en la Monnaie de Rouen la fabrication des écus d'or au soleil et des douzains

1541, 17 août

Arch. nat., Z1b 63 f° 6v°. Copie

De par les généraulx conseillers du roy, notre sire, sur le faict de ses monnoyes. Gardes de la Monnoye de Rouen. Nous avons receu lettres patentes dud. seigneur par lesquelles led. seigneur veult et ordonne quelz remeddes auront cy-après les maistres des Monnoyes sur l'ouvraige tant rouge, blanc que noir. A ceste cause nous vous mandons que vous ayez à faire continuer l'ouvraige des deniers d'or escuz au solleil à XXIII karats, I/VIIIe de karat de remedde, de LXXI escuz et I/VIe d'escu de poix au marc, qui sont II deniers XVI grains troys quars pièce tresbuchans, et les deniers douzains de IIIIxx unze pièces et ung quart de pièce au marc, au remedde de demye-pièce pour marc, qui est en neuf marcs quatre pièces et demye, et de loy à troys deniers seize grains argent-le-roy, à deux grains de remedde dud. argent-le-roy. Si n'y ayez à faire faulte sur peyne d'encourir les peynes de l'ordonnance, et sur le tout gardez icelles ordonnances dernièrement faictes sur le faict des monnoyes, tant à Fontainebleau, Bloys que autres lieux, lesquelles vous ont esté naguères envoyées, sur peyne de s'en prandre à vous. Escript à Paris en la Chambre des monnoyes le dix-septiesme jour d'aoust l'an mil Vc quarente et ung.