|



Injonction des généraux des Monnaies aux gardes, essayeur et maître particulier de la Monnaie de Paris de fabriquer des douzains en l'atelier monétaire de Paris

1541, 8 avril

Arch. nat., Z1b 9 f° 247v° et 248v°. Mention

Ont esté mandez et faict venir en la Chambre de céans Guillaume Sottin, l'un des gardes de la Monnoye de Paris, Nicollas Vaudor, essayeur de lad. Monnoye et Christophe de Laulne, maître particullier d'icelle, ausquelz a esté dict et enjoinct qu'il est besoing qu'ilz obéissent dilligemment à l'ordonnance dernièrement faicte par le roy le moys de mars dernier passé et qu'ilz ayent à icelle garder et observer, dont, incontinant la publicacion d'icelle ordonnance faicte, leur sera baillé coppie et, en actendant la publication d'icelle ordonnance que le maître d'icelle Monnoye ayt à faire ses alliages pour incontinant faire ouvrer et monnoyer deniers douzains à II deniers II grains pièce et IIIIxxXI pièces et I quart au marc, aussi que lesd. gardes ayent à contraindre réaulment et de faict les ouvriers et monnoyers de lad. Monnoye, tant du serment de France que de l'Empire, de ouvrer et monnoyer en lad. Monnoye et faire leur devoir ainsi qu'ilz sont tenuz, et faire au demourant par lesd. gardes, essayeur et maistre susd. le devoir de leurs estatz ainsi qu'ilz sont tenuz faire par les ordonnances sans qu'il en vienne plaintif à lad. Chambre, sur les peynes contenues esd. ordonnances.