Mandement des généraux des Monnaies aux gardes de la Monnaie de Rouen, exécutoire des lettres patentes du 24 février 1540 qui ordonnent l'interdiction de la fabrication de testons et qui ordonnent la fabrication de douzains aux salamandres
1540, 8 mars
Arch. nat., Z1b 62 f° 250r°. Copie
De
par les généraulx conseillers du roy, notre sire, sur le faict
desd. monnoyes. Gardes de la Monnoye de Rouen. Nous vous mandons que incontinant
ces lettres veues, suivant les lettres patantes du roy dont vous envoyons
le double signé du greffier de ceste Chambre, vous ayez à clorre
toutes et chacunes les boestes de lad. Monnoye, tant de l'or, blanc que noir,
et icelles closes envoyez incontinant par-devers nous pour en faire les jugemens
en la manière acoustumée, et oultre vous deffendons expressément
que ne faictes doresnavant ouvrer et monnoyer aucuns deniers gros et demys
gros testons, quelque matière de testons que ayez, soit en lingotz
ou flaons, sur peine de pugnition corporelle, ains continuez l'ouvraige des
deniers d'or escus soleil de LXXI et ung VIe de poix au marc, à XXIII
karatz, à ung huictiesme de karat de remède, de deux deniers
seize grains trébuschans chacune pièce, et ainsi que puis naguères
vous avons escript et mandé. Pour l'ouvraige desquelz escuz aura le
maistre particullier de lad. Monnoye quinze solz tournois pour le brassaige
ainsi que le roy a ordonné de nouvel. Et les deniers douzains faictes
les tailler de VII sols VIII deniers de poix au marc, à quatre deniers
quatre grains de loy argent-le-roy et à deux grains de remède
dud. argent-le-roy, sur le pris de douze livres dix solz tournois le marc
d'argent, en vous deffendant ne faire autre ouvraige que escus et douzains
s'il ne vous est autrement permys cy-après. Esquelz douzains ferez
mectre pour différance nouvelle, oultre les différances anciennes
et celles que naguères vous avons envoyées, deux salamandres,
tant du costé de la croix que de la pille, avec les légendes
acoustumées, dont nous vous envoyons les patrons cy-dedans encloz,
et les faictes tailler de grandeur suffisante ainsi que verrez estre à
faire pour le myeulx. Pour l'ouvraige desquelz grans blancs douzains aura
led. maistre de marc d'euvre V sols tournois de brassaige. Et oultre faictes
que tous et chacuns les deniers soient délivrez de bon poix et recours
ainsi que le roy le veult et entend, en sorte que lesd. douzains ne soient
plus foibles d'un grain que le droict ne plus fors d'un grain que le droict
au remède de IIII forts contre quatre foibles, et nous certffiez du
jour que aurez receu ces présentes. Et oultre vous advertissons que
sur les cinq solz tournois ordonnez aud. maître pour chacun marc de
douzains les ouvriers auront chacun ung lyard de creue pour marc, qui est
troys deniers oultre les XII deniers tournois qu'ilz ont eu par cy-devant
pour chacun marc, et les monnoyers auront VII deniers tournois pour chacun
marc desd. douzains, à prandre sur lesd. cinq solz ordonnez aud. maître.
Sy ne veillez faire faulte d'acomplir le contenu cy-dessus sur peine d'encorir
l'indignation du roy. Escript à Paris, en la Chambre desd. monnoyes,
le VIIIe jour de mars l'an mil cinq cens trente-neuf.
Faictes monnoyer lesdits douzains en sorte que toute l'escripture y soit et
qu'elle soit entière, et sy la lettre et légende n'est entière
ne laissez passer lesd. douzains en délivrance ains faictes les reffondre
sur peine de s'en prandre à vous.
Mention d'envoi : Rouen, Paris (8 mars 1540), Saint-Lô, Tours, Angers, Bordeaux, Poitiers, Bayonne, La Rochelle, Toulouse, Lyon, Villeneuve-Saint-André-lès-Avignon (9 mars 1540), Troyes (10 mars 1540), Limoges (11 mars 1540), Turin, Nantes (22 mars 1540).