Mandement des généraux des Monnaies aux gardes de la Monnaie de Rouen, exécutoire des lettres patentes du 14 janvier 1540 qui ordonnent de marquer les espèces monétaires d'une lettre de l'alphabet, particulière à chaque atelier monétaire

1540, 28 janvier

Arch. nat., Z1b 62 f° 244r°. Copie

De par les généraulx conseillers du roy, notre sire, sur le faict de ses monnoyes. Gardes de la Monnoye de Rouen. Nous avons receu lettres patentes du roy par lesquelles ledict seigneur veult et entend que par toutes les Monnoyes de son royaulme soit mys différance nouvelle suivant les lettres de la croix de par Dieu à commencer depuys et jusques à la fin de la dernière lectre pour obvier aux grans abbus et faultes que l'on a faict par cy-devant en plusieurs Monnoyes de ce royaulme. Et affin que les faultes que l'en fera doresnavant soient évidemment congneues et pour sçavoir par quelz maistres et en quelles Monnoyes ilz auront esté faictes nous vous mandons et enjoignons suivant le voulloir dud. seigneur bien et estroictement faire clorre toutes les boestes qui sont par-devers vous, tant du rouge, blanc que noir, pour icelles nous envoyer pour en faire les jugemens, et que vous ayez à faire serrer tous les fers, pilles et trousseaulx, et aussi faictes faire autres fers, pilles et trousseaulx ausquelz avec l'encienne différance de ladicte Monnoye et la différance du maistre vous faictes mectre de nouvel dessoubz l'escu de la pille la lettre de B, et aussi devers la croix, tant aux escuz, grans blans, testons que monnoye noire, suyvant le patron que vous envoyons icy cloz et faictes continuer l'ouvraige, c'est assavoir des escuz de LXXI et ung VIe de poix au marc de Paris et de deux deniers seize grains trébuschant à la pièce et à vingt-troys karatz, à ung huitième de karat de remedde, et les testons à vingt-cinq pièces et demye de poix au marc et de sept deniers douze grains douze dix-septiesme de grain ou deux tiers de grain à la pièce, en faicte que n'en laissez passer ung qui ne poise sept deniers douze grains trébuschant, et qu'ilz soient poisez pièce après autre, et taillez tous de bon recours et de faire droict poix avant que les délivrez, et les deniers douzains de sept solz huit deniers de poix au marc qui sont quatre-vingts-douze pièces, en sorte qu'ilz ne reviennent en neuf marcs pour plus foibles que de quatre pièces et demye qui est de foiblaige demye-pièce pour marc, sans autre remedde. Faictes que lesd. escuz soient allayez à vingt-troys karatz et ung VIIIe de karat de remedde et lesd. testons à XI deniers VI grains argent-le-roy qui sont dix deniers dix-huit grains troys quarts, à ung grain fin de remedde, et lesd. douzains à IIII deniers six grains argent-le-roy, à deux grains de remede qui est quatre deniers ung grain troys quarts fin qui est ung grain troys quarts fin de remedde. Et prenez vous garde de excedder lesd. remeddes sur peyne d'estre pugnis en corps et en biens en sorte que ce soit exempt aux autres. D'abondance nous vous envoyons dénéraulx tant d'escuz testons que douzains pour vous servir et vous enjoignons qu'il ne soit plus ouvré de deniers dizains karolus et de clorre les boestes d'iceulx sy aucuns en avez faict. Et ne faillez à nous faire incontinant responce et nous escripre le jour qu'aurez receu ces présentes, ensemble les différances des maistres et dénéraulx que nous vous envoyons. Escript à Paris en la Chambre desd. monnoyes le vingt-huitième jour de janvier l'an mil Vc trente-neuf.