Autorisation accordée par les généraux des Monnaies à André Cybot, maître particulier de la Monnaie de La Rochelle, pour faire fabriquer en la Monnaie de La Rochelle des dizains

1539, 14 novembre

Arch. nat., Z1b 9 f° 8v°. Mention

Sur la requeste présentée en la Chambre de céans par André Cybot, maistre particullier de la Monnoye de La Rochelle, contenant que depuys troys moys en ça nous ayons faict deffenses de ne faire ouvrer et monnoyer deniers dizains qui seroit comme il dit par sadicte requeste au préjudice dud. suppliant et de la chose publicq de lad. ville de La Rochelle et des environs, parce que en icelle ville de La Rochelle et ès environs ilz ne usent communément que [de] deniers dizains, requérant à ceste cause luy estre permis faire desd. deniers dizains et convertir des lyardz de Lozanne en deniers doubles tournois jusques à telle quantité que vouldrons ordonner. Considéré le contenu de laquelle. requeste il est permis aud. suppliant de pouvoir faire ouvrer et monnoyer des deniers dizains franciscus des poix, loy et cours contenuz ès ordonnances du roy, jusques au temps et terme de la my-karesme prochainement venant, et sont faictes deffenses de par ladicte Chambre aud. André Cybot de ne faire ouvrer et monnoyer aucuns deniers doubles tournoys sur les peynes contenues ès ordonnances.