Autorisation accordée par les généraux des Monnaies à Menault de Mondaco, maître particulier de la Monnaie de Bayonne, pour faire fabriquer en la Monnaie de Bayonne des dizains

1539, 14 novembre

Arch. nat., Z1b 9 f° 8r°. Mention

Sur la requeste présentée en la Chambre de céans par Menault de Mondaco, maistre particullier de la Monnoye de Bayonne, contenant que depuis troys moys en ça nous ayons faict deffences de ne faire ouvrer et monnoyer deniers dizains qui seroit comme il dict par sad. requeste au préjudice dud. suppliant et de la chose publicq de lad. ville de Bayonne et des envyrons, parce que en icelle ville de Bayonne et ès environs ilz ne usent communément que de deniers dizains, requérant à ceste cause luy estre permis faire desd. deniers dizains et convertir des lyardz de Lozanne en deniers doubles tournois jusques à telle quantité que vouldrons ordonner. Considéré le contenu de laquele requeste il est permis aud. suppliant de povoir faire ouvrer et monnoyer des deniers dizains franciscus des poix, loy et cours contenuz ès ordonnances du roy, jusques au temps et terme de la my-caresme prochainement venant, et sont faictes deffences de par lad. Chambre aud. Menault de Mondaco de ne faire ouvrer et monnoyer aucuns deniers doubles tournois sur les peines contenues ès ordonnances.