Autorisation accordée par les généraux des Monnaies à Hugues Lamyer, maître particulier de la Monnaie de Toulouse, pour faire fabriquer en la Monnaie de Toulouse des dizains

1539, 30 juillet

Arch. nat., Z1b 8 f° 421v°. Mention

Sur la requeste présentée en la Chambre de céans par Hugues Lamyer, maistre particulier de la Monnoye de Thoulouse, contenant que des vaches de Béard que par cy-devant avoyent cours en la ville dud. Thoulouse et autres lieulx circonvoisins et lesquelles vaches depuys certain temps en çà ont esté descriées et mises au feu pour billon et d'icelles pièces auroit esté porté grant quantité en lad. Monnoye de Thoulouse, lesquelles led. suppliant a fait affiner non sans grant coustz à cause que en lad. ville de Thoulouze n'y a argent fin qui ne soit fort cher et plus que l'ordonnance du roy ne porte, et desd. vaches led. suppliant a fait batre deniers dixains franciscus au poix et loy de l'ordonnance en grant quantité qui ne se pouvoyent convertir à autre espèce de monnoye que en deniers dixains franciscus, réquérant à ceste cause luy estre par nous permis la continuation desd. franciscus pour tel temps que vouldrons ordonner. Considéré le contenu de laquelle requeste nous avons permis et permectons aud. suppliant faire continuer l'ouvraige desd. deniers dixains franciscus des poix, loy et recours contenuz ès ordonnances du roy, notred. seigneur, jusques à Noël prouchainement venant, jusques ad ce que par led. seigneur ou nous autrement en soit ordonné.