|

Lettres missives qui ordonnent la fabrication de testons et demi-testons par l'atelier monétaire de Montpellier

1523, 21 mars

Arch. nat., Z1b 61 f° 103v°. Copie

Arch. nat., Z1b 62 f° 203v°. Copie

De par le roy. Noz amez et féaulx. Nous avons entendu qu'il y a gros nombre de billon qui vient chacun jour en notre ville de Montpellier et que par faulte que le maistre de la Monnoye dud. lieu n'a permission de forger testons et demys-testons en lad. Monnoye en ensuyvant l'ordonnance que nous avons derrenièrement faicte, nous estans à Troyes, il se transporte grosse quantité dud. billon hors notre royaume, par quoy avons advisé qu'il sera bon bailler permission aud. maistre de la Monnoye de forger testons et demys-testons des poix et aloy dont fut dépesché lad. ordonnance. A ceste cause nous vous mandons et enjoignons très expressement que vous permectez aud. maistre de la Monnoye de notred. ville de Montpellier de forger lesd. testons et demys-testons en ensuyvant lad. ordonnance, de laquelle vous luy baillerez ou envoyrez ung double en baillant ou faisant bailler par ceulx de lad. ville de Montpellier caucion souffisante se fait ne l'avoient jusques à quelque somme que adviserez, qu'il ne se fera aud. forgement et ouvraige qui se fabriquera en lad. Monnoye aucune faulte ou abbuz, et aussi que aux fontes et essaiz qui se feront en lad. Monnoye on appellera quelques bons personnaiges de lad. ville en ce entenduz pour avoir l'[o]ueil à ce que led. maistre forge loyamment et jouxte icelles ordonnances, sy n'y faictes faulte, car tel est notre plaisir. Donné à Sainct-Germain-en-Laye le XXIe jour de mars l'an mil cinq cens vingt-deux. Ainsi signé, Par le roy, Gedoyn.