|



Lettres missives qui ordonnent la fabrication de testons et demi-testons par l'atelier monétaire de Villeneuve-Saint-André-lès-Avignon

1522, 12 septembre

Arch. nat., Z1b 61 f° 102v°. Copie

Arch. nat., Z1b 62 f° 203r°. Copie

De par le roy. Noz amez et féaulx. Nous avons entendu qu'il habonde chacun jour en notre ville de Villeneufve-lez-Avignon grosse quantité de cendrées et argent blanc et que par faulte que le maistre de notre Monnoye aud. lieu n'a permission de faire ouvrer et monnoyer en lad. Monnoye des gros testons en ensuivant l'ordonnance que avons derrenièrement faicte, nous estans à Troyes, il s'en transporte grosse quantité hors de notre royaume, par quoy, suyvant la permission que avons faicte aud. maistre de la Monnoye de forger desd. gros testons et des demys du poix et loy dont fut derrenièrement dépesché lad. ordonnance. A ceste cause, nous voullons et vous mandons expressement que vous ayez à permectre aud. maistre de lad. Monnoye de notre ville de Villeneufve de forger desd. testons et demis en ensuyvant lad. ordonnance, de laquelle vous luy baillerez ou envoyrez le double, sy n'y faictes faulte, car tel est notre plaisir. Donné à Sainct-Germain-en-Laye le XIIe jour de septembre l'an mil cinq cens vingt-deux. Ainsi signé, Françoys et Robertet.

Exécutoire non retrouvé.