Autorisation accordée par les généraux des Monnaies aux gardes et maître particulier de la Monnaie de Limoges pour faire fabriquer en la Monnaie de Limoges des demi-écus d'or au soleil et la quantité de 600 marcs d'oeuvre de doubles deniers tournois

1521, 5 novembre

Arch. nat., Z1b 8 f° 6v°. Mention

Sur la requeste à nous le jourd'uy baillée par les officiers de la Monnoye de Lymoges, en nous requérant que leur voulsissions permectre de povoir faire ouvrer et monnoier en lad. Monnoye certaine quantité de doubles tournois et aussi des demyz-escuz au soleil de la sisaille qui viendra des escuz au soleil, nous, pour considération du contenu en lad. requeste, avons ce jourd'uy permys et octroié aux gardes et maistre particulier d'icelle Monnoye de povoir faire ouvrer et monnoier en lad. Monnoye des deniers doubles tournois jusques au nombre et quantité de six cens marcs seulement, à ung denier neuf grains de loy argent-le-roy, à deux grains de remède, de quinze solz huit deniers de poix au marc de Paris, sur le pris de douze livres dix solz tournois dud. marc d'argent, et oultre leur avons permys et octroyé qu'ilz puissent faire ouvrer et monnoier en icelle Monnoye des demyz-escuz au soleil de la sisaille qui viendra et ystre des escuz soleil qui seront doresnavant ouvrez et monnoiez en lad. Monnoye seulement, de la loy d'iceulx escuz et de ung denier huit grains de poix trébuschans.

1521, 6 novembre

Arch. nat., Z1b 8 f° 8v°. Mention

Ced. jour a esté permys et octroié au maistre particulier de la Monnoye de Lymoges de povoir faire ouvrer et monnoier en lad. Monnoye des doubles tournois jusques au nombre et quantité de VIc marcs seulement, à I deniers IX grains de loy argent-le-roy, à II grains de remède, de XV sols VIII deniers de poix au marc de Paris, sur le pris de XII livres X sols marc d'argent. Et oultre luy a esté permys qu'il puisse faire, ouvrer et monnoier en lad. Monnoye des demyz-escus au soleil de la cisaille qu'il viendra desd. escuz.