|

Lettres missives qui ordonnent la fabrication de testons et demi-testons par l'atelier monétaire de Limoges

1521, 26 octobre

Arch. nat., Z1b 61 f° 91r°. Copie

Arch. nat., Z1b 62 f° 194r°. Copie

De par le roy. Noz amez et féaulx. Nous avons entendu qu'il y a gros nombre de billon qui habonde par chacun jour en notre ville et cité de Lymoges et que par faulte que le maistre n'a permission de forger en lad. Monnoye en ensuivant l'ordonnance que avons derrenièrement faicte, nous estans à Troyes, il se transporte grosse quantité dud. billon hors de notred. royaume, parquoy avons advisé qu'il sera bon bailler permission aud. maistre de la Monnoye de forger testons et demis-testons du poix et de loy dont fut dépescher derrenièrement lad. ordonnance. A ceste cause, nous vous prions et néantmoins mandons très expressement que vous ayez à permectre aud. maistre de la Monnoye de notred. ville et cité de Lymoges de forger desd. testons et demis-testons en ensuivant lad. ordonnance, de laquelle vous luy baillerez ou envoyrez ung double, sy n'y faictes faulte, car tel est notre plaisir. Donné au camp de Candan le vingt-sixiesme jour d'octobre [1521]. Ainsi signé, Françoys, et au-dessoubz, Robertet.