|

Mandement des généraux des Monnaies aux gardes, maître particulier, contregarde, essayeur et tailleur de la Monnaie de Toulouse, exécutoire des lettres patentes du 21 juillet 1519 relatives à l'ouverture de la Monnaie de Toulouse, autorisant la fabrication d'écus d'or au soleil, douzains et dizains par l'atelier monétaire de Toulouse

1521, 26 mars

Arch. nat., Z1b 61 f° 82r°. Copie

Arch. nat., Z1b 62 f° 187r°. Copie

De par les généraulx conseilliers du roy, notre sire, sur le fait de ses monnoyes. Gardes, maistre particulier, contregarde, essayeur et tailleur de la Monnoye de Thoulouse. En acomplissant le contenue ès lettres du roy, notred. seigneur, données à Sainct-Germain-en-Laye le vingt-ungiesme jour de juillet mil cinq cens dix-neuf, dont la coppie collationnée à l'original est cy-dessus transcriptes, nous vous mandons que faictes forger en lad. Monnoye escuz au soleil selon les patrons et formes que vous envoyons, et grans blancs de douze deniers et dix deniers tournoys pièce, des poix et loy dont mencion est faicte esd. lettres qui auront cours pour les pris contenuz en icelles. Et faictes tailler lesd. escuz de leur droit poix qui est deux deniers seize grains troys quars chacune pièce, en manière que à la délivrance ilz se treuvent du poix de II deniers XVI grains trébuchans pour le moins, et seront les grans blancs douzains, le blanchissaige fait et prestz à délivrer de deux deniers deux grains chacune pièce, à ung grain de remedde sur le fort et sur le foible, en manière qu'il y en ait autant de fors que de foibles et que à la délivrance ilz ne soient point plus foibles que de demy-denier pour marc, et les grans blancs de dix deniers tournoys pièce reviennent le blanchissage fait et prestz à délivrer du poix de ung denier XXIII grains, aux remeddes sur marc et sur pièces ainsi que les grans blancs de douze deniers tournoys pièce, en donnant par vous, maistre particulier, à ceulx qui livreront l'or en lad. Monnoye sept-vingtz-sept livres tournoys pour chacun marc d'or fin et douze livres dix solz tournois pour marc d'argent à douze deniers de loy argent-le-roy et non plus. Et vous donnez garde que à la taille desd. ouvraiges ne soit faicte faulte et si aucunes si treuvent faictes refaire l'ouvraige et de rechef tailler et ouvrer aux despens des ouvriers, sur peine d'en porter la peine pour eulx, et vous, tailleur, taillez doresnavant les fers desd. escuz et grans blancs selon lesd. patrons, avec l'ancienne différence de lad. Monnoye, en continuant le compas, rotondité et largeur d'iceulx avec la lettre et escripture sans la faire plus longue, gresle ou abrégée, et à ce que nous soyons plus acertenez nous envoyez dedans ung moys après la réception de ces présentes les patrons desd. escuz et grans blancs que aurez ainsi taillez, pour estre veuz et gardez en la Chambre desd. monnoyes, et s'il advient que led. tailleur mue ou change vous, gardes, nous envoyez les patrons du tailleur nouvellement ordonnez. Et vous tous, chacun selon le deu de voz offices et en tant que à chacun de vous touche, faictes nouveaulx pappiers bons et vrays, en gardant en ce et toutes autres choses le contenu ès ordonnances faictes sur le fait de voz offices et charges, le tout sur les peines contenues et déclairées en icelles et d'autre si griefve pugnicion que ce doive donner exemple à ung chacun, et nous escripvez par homme seur venant par deçà dedans le moys de may prochainement venant la réception de ces présentes. Donné à Paris en la Chambre des monnoyes, soubz noz signetz, le vingt-sixiesme jour de mars l'an mil cinq cens et vingt avant Pasques. Ainsi signé, Le Père.