Lettres d'entérinnement de la Chambre des monnaies des lettres patentes du 4 juillet 1516 et du 8 mars 1518 autorisant la réouverture de l'atelier monétaire de Bourges

1518, 27 juillet

Arch. nat., Z1b 61 f° 55r°. Copie

Arch. nat., Z1b 62 f° 168r°. Copie

Les généraulx conseilliers du roy, notre sire, sur le fait de ses Monnoyes. Veues par nous les deux lettres patentes du roy, notred. seigneur, ausquelles ces présentes sont atachées soubz l'un de noz signetz, à nous présentées de la partie des maire, eschevins, bourgeois, manans et habitans de la ville de Bourges, par les premières desquelles, qui sont données à Lyon le IIIIe jour de juillet l'an mil cinq cens et seize, led. seigneur veult et ordonne que la Monnoye de lad. ville de Bourges soit ouverte par les maistre, gardes, essayeur, tailleur, prévost, ouvriers et autres officiers de lad. Monnoye qui ont esté par cy-devant pour y estre ouvré et monnoyé doresnavant selon et en ensuyvant les ordonnances faictes sur le fait desd. monnoyes, et par les secondes, qui sont données à Amboise le huitiesme jour de mars, icelluy seigneur a relevé et relève les dessusd. maire, eschevins, manans et habitans dud. Bourges de ce qu'ilz n'ont présenté lesd. premières lettres dedans l'an et dacte d'icelles, et pour ce qu'il nous est apparu que le roy, notred. seigneur, par autres ses lettres patentes données à Paris le VIe jour de mars l'an mil cinq cens et seize, signées Par le roy, Gedoyn, a voullu et ordonne, veult et luy plaist que doresnavant et jusques à ce que par luy autrement en soit ordonné les maistres des mynes d'argent de son royaume soient tenuz de porter aux maistres particuliers des plus prochaines Monnoyes d'icelles mynes tout l'argent qu'ilz trieront et affineront en icelles sans le porter vendre ailleurs, sur les peines contenues esd. lettres et ès ordonnances royaulx sur ce faictes, lesquelz maistres particuliers desd. Monnoyes seront tenuz prendre desd. maistres des mynes led. argent et leur en bailler pour chacun marc de cendrée douze livres tournoys, et icelluy argent forgeront en leursd. Monnoyes et convertiront en gros testons de dix solz tournoys pièce, du poix et aloy que ceulx que led. seigneur a derrenièrement fait forger en sa Monnoye de Lyon qui est de deux solz ung denier et demy de poix au marc de Paris, pesans chacune pièce sept deniers douze grains deux tiers de grain, et demy-grain de remedde sur chacune pièce, et de loy à unze deniers dix-huit grains argent-le-roy, à ung grain de remedde, qui auront cours pour dix solz tournois la pièce.
[...]
Nous, après avoir sur ce oy les gens du roy en la Chambre desd. monnoyes, consentons l'entérinnement desd. lettres pourvueu que tout l'argent qui sortira et viendra desd. mynes plus prochaines de lad. Monnoye de Bourges sera converty esd. gros testons des poix, loy, cours et remedde cy-dessus déclairez et que tout le prouffit et esmolument qui en viendra et ystra (sic) sera baillé et délivré par le maistre particulier d'icelle Monnoye à Françoys Ra, receveur des boestes, prouffit et esmolument de toutes les Monnoyes de ce royaume pour convertir ou fait de son office.
[...]
Donné à Paris en la Chambre desd. Monnoyes, soubz noz sceaulx, le XXVIIe jour de juillet l'an mil cinq cens et dix-huit.