Lettres missives qui ordonnent la fabrication de testons en la Monnaie de Paris

1516, 28 mai

Arch. nat., Z1b 61 f° 34v°. Copie

De par le roy. Noz amez et féaulx. Pour ce que pour fournir aux affaires de noz guerres nous avons fait emprunter de plusieurs noz bons et loyaulx serviteurs et officiers ung grant nombre de vaisselle d'argent, laquelle nous avons advisé pour nous en aydes présentement à nosd. affaires faire monnoyer et forger en testons de dix solz tournois pièce. A ceste cause nous voullons que toute lad. vaisselle d'argent qui sera livrée en notre Monnoye de Paris par notre amé et féal conseiller maître Philibert Babou ou par l'un de ses commis vous la faictes monnoyer et forger esd. testons de semblable aloy et poix que estoient ceulx qui y furent forgez du temps de feu notre très cher seigneur et beau-père, et que l'un de vous soit présent à veoir faire la fonte qui sera faicte de lad. vaisselle affin que lad. fonte soit à la moindre perte et déchet que faire se pourra, et à ce ne faictes faulte, car tel est notre plaisir. Donné à Lyon le XXVIIIe jour de may mil VcXVI. Ainsi signé Françoys, Deneufville.