Mandement des généraux des Monnaies aux gardes de la Monnaie de Lyon pour la fabrication d'écus au soleil et de douzains

1515, 23 janvier

Arch. nat., Z1b 61 f° 25v°. Copie

Arch. nat., Z1b 62 f° 146r°. Copie

De par les généraulx maistres des Monnoyes du roy, notre sire. Gardes de la Monnoye de Lyon. Nous vous envoyons les patrons des escuz soleil et grans blancs couronne que le roy, notre sire, a ordonné présentement estre ouvrez et monnoyez en ses Monnoyes cy-dedans encloz, lesquelz escuz vous ferez ouvrer et monnoyer de soixante-dix de poix au marc de Paris, qui est semblable poix et loy que les escuz au porc-espic que l'en avoit acoustume ouvrer, et y faictes mectre l'escripture telle qu'elle est esd. patrons. Et faictes ouvrer les grans blancs à quatre deniers douze grains de loy argent-le-roy, à deux grains de remedde, de sept solz deux deniers de poix au marc de Paris, qui auront cours pour douze deniers tournoys pièce. Et faictes tailler lesd. escuz et grans blancs aux recours chacune pièce et ainsi qu'il est déclairé ès dernières ordonnances, et aussi faictes casser et rompre tous les fers, tant d'or que du blanc, de l'ouvraige précédent, sy n'y faictes faulte. A Paris, en la Chambre desd. Monnoyes, le XXIIIe jour de janvier l'an mil cinq cens et quatorze.

Mention d'envoi : Lyon, Bordeaux (23 janvier 1515), Bourges (24 janvier 1515), Limoges (29 janvier 1515), Paris (16 février 1516), La Rochelle, Rouen (19 février 1515), Châlons (5 mars 1515), Saint-Lô (6 mars 1515), Montpellier (22 mars 1515), Tours (30 mars 1515), Poitiers (3 avril 1515).